Nobina Sverige ABk, Eskandinaviako garraio publikoko operadore handienetako batek, Solarisekin beste kontratu bat sinatu du, Suediako Malmö hirian zirkulatuko duten zero isuriko 180 Urbino autobus elektriko entregatzeko. Kontratuak 150 milioi euro inguruko bolumena izango du.
Solarisek eskualde horretan inoiz jaso duen autobus elektrikoen eskari handienetako bat da, eta Solarisek eta Nobinak azken urteotan izandako lankidetza luze eta arrakastatsu horretan beste etapa bat ekarriko du. Flota berriak 180 autobus elektriko ditu, eta 2026tik 2027ra bitartean entregatzea aurrez ikusten da. Ibilgailuak luzera ezberdinetakoak izango dira: 12, 15, 18 eta 24 metrokoak. Ibilgailu horiek Malmöko hiri-ibilbideetan nahiz hiri-ingurukoetan emango dute zerbitzua. Suediako hirugarren hiri handiena da Malmö, eta inbertsio handi horren bidez, aurrerapauso argia emango du garraio publikoaren sistema erabat elektrifikatzeko bidean.
Malmö hiri garrantzitsua bihurtu da Solarisek Eskandinaviako herrialdeetan egindako ibilbidean. Hain zuzen ere, ibilgailu ugari hornitu ditu bere garraio-sarerako, batez ere trolebusak eta autobus elektrikoak. Gainera, Malmö da 24 metroko luzera duten autobús biartikulatuek hiriko zirkulazio erregularrean operatzen duten Europako hiri bakarretako bat.
Zehazki, sinatutako kontratuak honako hauek hartzen ditu barne: Solaris Urbino 18 modeloaren 78 autobus elektriko artikulatu, 600 kWh-ko bateria-ahalmena dutenak; Solaris Urbino 24 modeloko 36 autobus elektriko, 700 kWh-ko bateriak dituztenak; Urbino 15 LE modeloko 65 autobus elektriko, 500 kWh-ko bateriak dituztenak; eta Solaris Urbino 12 modeloko autobus elektriko bat, 400 kWh-ko bateria-ahalmena duena. Ibilgailuen luzeren eta konfigurazioen aukera zabal horri esker, flota ezin hobeto egokituko da hiriaren eta inguruko eskualdearen behar operatiboetara.
Horrez gain, Solaris 2003tik dago Suedian eta, ordutik, 800 autobus inguru entregatu ditu. Duela gutxi, bi kontratu esleitu dizkiote (guztira 170 autobus elektriko), Stockholm eremuko eta Escania probintziako hiri barruko eta hiri-inguruko ibilbideetan zerbitzua emateko.
Malmörako eskaerak, eskualdeko helburu klimatiko handiak lortzeko bidean beste urrats garrantzitsu bat izateaz gain, Solarisek garraio publikoa isuririk gabeko soluzioetara eraldatzeko duen funtsezko zeregina ere berresten du.
CAFentzako merkatu estrategikoa
Eskandinavia CAFentzat merkatu estrategikoa da eta hazten ari da. Izan ere, bertan, trengintza arloko proiektu ugari egin ditu, besteak beste, Oslo hiria aireportuarekin lotzen duen abiadura handiko linearako unitateak hornitzea, Helsinkiko metroa, eta Stockholm, Oslo eta Lund hirietarako tranbia-flotak.
Suediari dagokionez, zehazki, bi tren-kontratu handi ari da CAF gaur egun gauzatzen herrialde hartan. Lehenengoa AB Transitio eta SJ AB operadoreentzat gauzatzen ari den eskualdeko 50 tren baino gehiagoko hornikuntza da (etorkizunean, gainera, akordioan jasotako aukeren bidez, biak handi daitezke). Horri guztiari EuroMainten jarduera gehitu behar zaio. 1.000 langile baino gehiago ditu, liderra da Suediako trenbide-zerbitzuen sektorean, eta mantentze-lanekin lotutako kontratuak ditu sinatuta eskualdeko tren-flota nagusietako batzuekin. Gainera, jarduera horrez gain, tren arloko osagaiak hornitzen dizkie operadoreei.
Horrek guztiak berretsi egiten du Suediak mugikortasun jasangarriagoa lortzeko eraldaketapolitikaren alde egindako apustu sendoa, eta CAFek arrakastaz hartu du parte horretan azken urteotan eskualdean garatutako proiektu ugarien bidez.
.