CAFek beste kontratu bat eskuratu du Frantzian eta, horrekin, Frantziako tren-merkatuan duen presentzia sendotu du. Kontratu berriaren zenbatekoa 250 milioi euro ingurukoa da. Enpresak eskualdeko 22 Régiolis tren hornituko dizkio SNCF Voyageurs operadoreari Région Suderako (Proventza-Alpeak-Kosta Urdina).
Horri esker, SNCF Voyageursek, eskualdeko tren-zerbitzuak operatzeaz arduratzen den enpresak, CAF-Alstom kontsortzioan jarritako konfiantza berrituko du eskualdeko trenen eskari berri honekin. Material gurpildun berriak aurretik Région Sudek eskuratutako 17 treneko flota osatu eta gaur egun linea hauetan funtzionamenduan dauden unitateak ordezkatuko ditu: Marseilla-Aubanha-Toulon-Hyères eta Marseilla-Toulon-Les Arcs Draguignan lotzen dituena.
CAFek diseinatu eta fabrikatuko ditu trenak Alsaziako Reichshoffen lantegian, eta Alstom arduratuko da unitaterako zenbait ekipo hornitzeaz. Régiolis eskualdeko tren elektrikoak dira, sei kotxekoak, eta 310 bidaiarirentzako edukiera dute. Tren horiek erosotasun handia eskaintzen diete bidaiariei, leihate handiak, zeharkako LED motako zeharkako barneargiztapena eta eserleku erosoak baitituzte, irakurtzeko argiekin eta korronte-harguneekin. Gainera, mugikortasun murriztua duten bidaiarientzat erreserbatutako espazioak dituzte. Horrez gain, unitateek TSI 2023 arauak beteko dituzte. Arau horiek ke- eta su-isurien arloko eskakizunei eta erabilitako materialei dagokienez zorrotzagoa dira.
CAFek berretsi egin du Frantzia bere merkatu nagusietako bat bihurtzearen alde egindako apustua
Hain zuzen ere, 2019tik, CAF funtsezko eragilea da Frantziako trengintza arloan bere arrakasta komertzialei eta konpromiso industrialari esker. Eskaera berri horrek berretsi egiten du herrialdean duen industria-estrategia, bi produkzio-instalazio baititu: Bagnères-de-Bigorren dagoen lantegia, tranbiak eta tren laburrak fabrikatzen espezializatua, eta Reichshoffeneko lantegia, 50 metrotik gorako luzera duten trenak egiten dituena.
Horrekin lotuta, gogorarazi beharrekoa da CAF Taldeak Frantziako merkatuko produktu gama zabalenetako bat duela gaur egun: distantzia luzeko Intercité trenak, zero isuriko autobusak, RER unitateak, tranbiak eta metroak. Horrek guztiak indartu eta jarraipena ematen dio CAFek Frantzian duen presentziari, eta merkatu hori konpainiarentzako nagusietako bat izango da datozen urteetan. Era berean, Frantziako lantegietarako industria-kargen plana finkatu du, eta Frantzian garraio publikoa garatzeko tokiko, eskualdeko eta Estatu mailako agintarien epe luzeko erreferentziazko enpresa eta bazkide gisa CAFek duen posizioa indartu du.
Gaur egun, CAF herrialdeko tren-sare nagusi batzuentzako kontratuak garatzen ari da eta horien artean honako hauek aipa ditzakegu: trenen hornikuntza Pariseko RER B aldiriko linearako, Intercité unitateak SNCF operadorearentzat (Paris-Clermont eta Paris-Toulouse eta Bordele-Marseilla lineetan zerbitzua emateko) edo tranbiak hornitzeko proiektuak Montpellierreko, Tourseko eta Grenobleko metropoli eremuetarako.
.