Metropolitan Area Transport Ltd, Helsinki City Transportek eta Länsimetro Ltd-ek, Helsinkiko metroa administratzen eta kudeatzen duten erakunde jabeek, baieztatu dute CAFek garatutako CBTC (Communications-Based Train Control) sistemarekin azpiegitura osoko seinaleztapena modernizatzeko kontratua CAFi esleitu diotela. Sistema horren izena OPTIO da. Aurrekoaren ondorioz, CAFek lehendik hornitutako M300 unitateen flota modernizatzeko eta aginte-postua hornitzeko lanak ere sartzen dira hitzarmenean, trenen kontrol-sistema horrekin bateragarriak diren eta ibilgailuetan sartuta egongo diren seinaleztapen-ekipoak gehitzeko. Kontratuaren bolumena 60 milioi euro baino gehiagokoa da.
Kontratua urrats garrantzitsua da CAFentzat, trenbideko seinaleen alorrean enpresak egindako apustua berresten baitu. Aldi berean, gainera, metroen gidatze automatikoaren alorrean erreferentzia berria emango dio CAFi, iazko urtearen amaieran Napoliko metrorako lortutako kontratu garrantzitsuaren ondoren. Horrek gaur egungo trenbideko seinaleztapeneko soluzioen (trackside) eta tren barruko soluzioen (on-board) gama osatuko du, Main Line segmentuan (trenbide-sare orokorra). Izan ere, Helsinkirako proiektuaren kasu zehatzean, OPTIO sistemak metro-sarearen funtzionamendua gaituko du modu automatikoan (GoA2), eta lineen muturretan arreta beharrik gabeko itzulera automatikoko maniobrak (GoA3) egiteko aukera emango du.
Finlandiako hiriburuko metro-sareak 43 kilometro inguru ditu, eta bere bi lineen bidez Helsinki hiria eta ondoko Espoo udalerria lotzen ditu. 1982an inauguratu zen, eta 30 geltoki ditu. Urtero, 78 milioi bidaiari baino gehiago garraiatzen ditu.
Abian jarritako proiektuaren helburu nagusietako bat da sistema modernizatzea, fidagarritasun handiagoa emateko eta operazioan zehar automatizazioa handitzeko. Gainera, proiektuaren elementuak eta funtzionalitateak pixkanaka egokituko dira. Horrez gain, trenen maiztasuna handitzeko aukera ere eskainiko du, datozen urteetarako aurrez ikusitako eskaera handiagoari aurre egiteko. Hori guztia seinaleztapen-soluzio aurreratuaren bidez egingo da, eta, aurreikuspenen arabera, 2029. urtean jarriko da martxan zerbitzu komertzialean.
Kontratu horrek agerian utzi du prestigio handiko operadore honek -Helsinkiko metroa-, CAFengan jarritako konfiantza, eta bi enpresen arteko lankidetza indartu du, aurreko urteetan CAFek Finlandiako hiriburuko sarerako 25 metro-unitate fabrikatu eta hornitu ondoren. Era berean, azpimarratu beharrekoa da Eskandinaviako eskualdea trenbide merkatu estrategikoa eta hazten ari dena dela CAFentzat. Hala, enpresak hainbat proiektu bideratu ditu han, besteak beste, Oslo hiria eta aireportua lotzen dituen abiadura handiko linearako unitateak hornitzea, Stockholm, Oslo eta Lund hirietarako tranbia-flotak, edo Suediako Transitio AB eta SJ AB trenoperadoreentzat eskualdeko trenen flota berriak hornitzeko gaur egun garatzen ari den trenen bi kontratu handiak.
.