Solarisek bi kontratu berri lortu ditu Suedian eta, guztira, 170 autobus elektriko hornituko ditu. Bi eragiketen guztizko bolumena 100 milioi euro baino gehiagokoa da.
Alde batetik, Suediako Nobina Sverige AB operadoreak Solaris hautatu du Stockholmen zerbitzua emango duten 89 autobus elektriko hornitzeko eta kontratu hori operadore berak orain gutxi Solarisek egindako beste batzuei gehituko zaie.
2024an, Solarisek 55 autobus elektriko entregatu zizkion Nobinari Suediako hiriburuko lineetan operatzeko. Gainera, operadore berak herrialdearen hegoaldean, Escania probintzian, eskaintzen dituen zerbitzuetarako beste 28 unitate entregatu zizkion. Oraingoan, unitateak Solaris Urbino 15 LE modelo elektrikokoak izango dira eta entregak 2026ko lehen seihilekoan egitea aurrez ikusi dute. Zerbitzua Stockholm eremuko hiriko eta hiri inguruko ibilbideetan eskainiko dute.
Bestalde, VR Sverige ABk, Suediako garraio publikoko operadore nagusietako batek, 81autobus elektriko jasoko ditu. Horiek ere Solaris Urbino 15 LE modelokoak izango dira. Ibilgailu berriak 2026ko bigarren hiruhilekoan gehituko dira Stockholmeko hiri inguruko lineetan zerbitzua ematen duten flotara.
Bi kasuetan aukeratutako modeloa Solaris Urbino 15 LE da, hiriko garraiorako zein hiri arteko garraiorako diseinatutakoa. II Klasean homologatutako ibilgailua da eta, horrenbestez, batez ere hiriarteko eta metropoliko ibilbideetan operatuko du. Ibilgailu bakoitzak edukiera handiko Solaris High Energy bateriak izango ditu eta, ondorioz, operazioan autonomia handia izango du bermatuta. Unitate horiek barrualde zabala dute, eta bidaian erosotasun handia eskaintzen dute. Gainera, gidariari laguntzeko sistema aurreratuak dituzte, zerbitzuaren segurtasuna hobetzeko. Eta, jakina, isuririk sortzen ez duten ibilgailuak dira, eta horrek garraio publiko moderno eta jasangarria garatzen laguntzen du.
Bi kontratuek zero isuriko mugikortasunera bidean beste aurrerapauso bat ekarriko dute Eskandinaviako herrialde hartan. Gainera, nabarmentzekoa da garraio mota horrek gero eta garrantzi handiagoa duela bertan; hala, horren erakusgarri da iaz Suedian matrikulatutako hiri-autobusen % 84 zero isuriko ibilgailuak izatea. Hiri-mugikortasun jasangarriagoa lortzeko eraldaketaren alde egindako apustua da eta CAF horren partaide da azken urteotan enpresak eskualdean garatutako proiektu ugarien bidez.
Solaris Suediako merkatuan presente dago 2003tik eta dagoeneko 800 autobus inguru hornitu ditu bertan, bateria eta hidrogeno bidez propultsatutako ibilgailu garbiak barne. Horrekin lotuta, gogoan izan behar da aurreko ekitaldian, 2024an, Solarisek 1.525 ibilgailu hornitu zituela Europan, aurreko ekitaldian baino % 5 inguru gehiago, eta arrakasta horretan eragin nabarmena izan zuela zero isuriko edo emisio txikiko unitateen (bateria, hidrogenoa, trolebusak eta hibridoak) bolumenak, urteko entregen % 83ko errekorra lortu baitzuten.
.